【Now財經台】友邦保險(01299)今日(29日)開市前出咗首季業績，新業務價值創季度新高，公司又宣布股份回購計劃加碼20億美元至120億美元，又宣布改善資本管理政策，透過股息及股份回購向股東返還資本。雖然友邦每年派息都有增長，但股息率唔高，據《彭博》數據顯示，依家股息率唔夠3厘，喺咪想透過提升股東回報留住股東？派息係咪有望逐步增加？
博威環球證券金融首席分析師聶振邦指，睇返新業務價值走勢，今年都應該會有增長，但增速可能會放慢。友邦財政狀況唔錯，加碼回購會釋出一個訊號，就係股息分派或會出現上調趨勢，對股東及潛在投資者嚟講係會增加吸引力。
股價方面，聶Sir話，友邦股價之前持續弱勢，兩個新消息都有助股價回穩，但如果要有好大提振作用，始終要睇未來業績係咪可以持續高增長。技術走勢上，佢就話，友邦股價可能喺60元有阻力，如果今個星期可以企穩，「五一黃金周」後有機會逐步上試63至65元位置。
