【now.com財經】TGIF！但係一起身好似夜晚咁黑，起身無耐仲要出埋黃雨訊號，落足一個星期雨都咪話唔煩...
不過恒指同個天玩相反，四連升之下指數已經上破咗日線圖嘅「長方形」頂線，今朝再開升51點後，搭正9點半同神舟18一樣，開市8分鐘後已經順利升抵17,500點樓上，亦即熊證重貨區。作戰室未開市已經準備定好倉應市，事關單睇今日牛熊證街貨圖，牛熊兩兩者距離相距差不多900至1,000點，大戶借指數打街貨都會取易不取難啦，咩事要佢無啦啦向下回成千點食瘦牛先?!
小時圖噚日都Mark住咗條10線，今日返嚟本來都Mark住佢做下方量度線，但指數一開市就飆咗上去，10線未踩就向上行兼生出「小圓底」再順便破埋。開市首半個鐘佢已經做咗咁多嘢，再到依家10點3分，見小時圖由4月22日至今一直沿保歷加通道頂線同10線向上運行，Slow STC(14.3)兩線頂住超買位都咪話唔驚，不過我哋做Day Trade嘅，有格就執架啦！
坦白講依家小時圖見指數已經跳高於10線樓上，即使借保歷加頂同10線行Swing Trade的話，呢個位都唔係一個合適入好倉嘅位置，除非保歷加通道口拓闊，咁就硬追隻恒指牛(56050)，收回價16,828點，同現價有逾660點已經係市場上最貼價牛證嚟架啦，Pick佢因為槓桿有約26.11倍都已經係市場上最高架啦，等睇今日17,500重貨熊下場係點啦。
作者阿珊，以技術分析專心玩輪證，唔貪心，努力賺取我家肥貓罐罐。
Patreon新增內容《開市前速報》，七日免費試用：https://www.patreon.com/join/cbbcwar
