【Now財經台】美股隔晚個別發展，納指收市微升16點，收市後Meta出季績，期貨急跌，股價盤後大跌近20%，Meta展望未來會投資更多發展人工智能(AI)。喺AI熱潮下，Meta係咪最先受惠嘅下游行業？成個美股應該點部署？
東亞銀行財富管理部首席投資策略師李振豪指，整個美股都處於調整階段，首當其衝係科技股，呢個調整唔係逆轉。唔單止Meta，其他將會公布業績嘅科技股，市場預期呢啲股份盈利雖好，但資本開支會增加。投資者可以留意上流業務，芯片及代工都係最後贏家。有芯片股即將出業績，可能會出現回調，未嘗唔係一件好事，投資者可以喺中長線吸納。
佢又話，軟件研發屬於中下游，研發平台或設計語言系統會係「第二啖湯」。如果投資者對科技股有興趣，首選係研發硬件嘅上游業務，其次係研發軟件及配套嘅中游，最後係通訊服務。
