【Now財經台】恒生投資推出首隻追蹤美股標普500指數嘅交易所買賣基金(ETF)，周二(23日)正式上市，屬於被動型基金，市場普遍覺得主動型基金跑贏被動型，但睇返恒生投資統計，係被動型基金跑贏，究竟應該點揀ETF？呢隻ETF管理費每年最高0.55%，相比美國上市嘅標普500 ETF，分別大唔大?
恒生投資行政總裁李佩珊指，揀咩類型基金，應取決投資者偏好、風險胃納同投資目標，主動型基金比較努力選股，市場對主動型基金期望回報會較高，有機會跑贏大市；而被動型基金較簡單同低收費。過去5年，於比較成熟嘅市場，被動型基金回報比主動型基金回報高，因為呢類市場有充分股票交易同研究，資訊可即時反映喺股價，所以投資者比較難主動增加額外收益。
Rosita又話，美國市場上都有相關嘅ETF，管理費的確較低，但要喺美股交易時段先可以買賣，而恒生標普ETF就可以喺本港交易時段買賣，亦可以用港幣交易，入場門檻大約780港元。
