【Now財經台】大型科網股齊齊反彈，中概股由昨晚(22日)喺美股金龍指數反彈，一路延續升勢到今早(23日)嘅港股。ATMXJ 5巨頭今日全線都升緊，到底有咩原因？
華盛證券財富管理部董事李偉傑認為因為估值平，比起外圍重磅科技類股份，例如英偉達(Nvidia)嘅60幾倍市盈率(PE)或Facebook母公司Meta約27倍PE，本港科技股仍然有追落後空間。至於點解而家先追，佢認為因為向上修復機會進一步出現，美國今年係大選年，加上美股最近開始回套，好多科技股喺高位有受壓，唔排除部分資金會逐步喺大選前流返港股抄底。此前美股炒高一直都係憧憬減息，但直到目前都未見有減息時間表，美股開始回套。反而港股一直無炒減息，所以開始追落後。加上板塊部分股份有新遊戲推出，令投資意欲更強。
