【now.com財經】噚日揀咗隻恒指牛(55580)，平均買入價為0.04元，如常的用返Slow STC(14.3)Swing Trade一趟就收工，所以噚日【輪證下半Part】出文之後要做嘅嘢就係等睇指數於五分鐘圖上會係有力向上爆高多一下，還是Slow STC(14.3)最後都係不敵橫行中嘅保歷加通道再向下行。
終於等到2點10分，確認指數無再向上高衝一下之餘，Slow STC(14.3)兩線仲向返超賣方向出發，如是者(55580)就要起身。如常用返10分鐘作為走貨時間的話，按2點10分至2點20分期間，(55580)高低位做過0.044元/0.042元，平均走貨價為0.043元，呢一趟持貨唔耐，計埋食飯時間三個鐘都無平均小執3格或7.5%，做咩啫，正數呀！飲杯奶茶都好呀！
噚日同個老友兩個喺樓企樓下商場求其搵間肯廳食個飯就當過生日，由中一識到依家，隨住年紀嘅增長過嘅每一年生日都愈嚟愈「求其」；或者就係識咗對方咁耐先至可以咁「求其」。但係噚晚有一句佢講得好啱：「今年唔好咁求其啦，唔係下一次都唔知幾時食啦」係囉，出年畢業佢就申請visa離港啦，但係到最後我哋「依舊求其」。
依家9點44分，出面雨愈落愈大，恒指開市高走見過16,700點之後都重新返番去接近今朝開市水平，依家做緊16,648點，升137點，小時圖上見指數目前守住喺100/150線之上，作戰室未有太大動靜，因為大家都係等緊呢兩條線倒底可唔可以守得住指數，順便睇塒小時圖整條保歷加通道向上時，指數係咪借頂線同100/150線作Swing運行。
見指數行得咁慢，先處理Patreon其他文章，Upload後返嚟見終於過咗10點，五分鐘圖上指數借得到10線想出「圓底」但唔係好夠力，小時圖則見指數算是重新守返100/150線，整條保歷加通道保持向上，唔通一開市就要用時間換格仔？
恒指牛(55551)，收回價16251點，同現價有約365點，今日啲牛有啲跳，再向上數的話，收回價就去到16,300點，一縮縮到同現價得返316點左右嘅距離，企後少少安全啲嘅，槓桿都有約38.64倍OK啦，但記得拉好小時圖嘅100/150線呀。
作者阿珊，以技術分析專心玩輪證，唔貪心，努力賺取我家肥貓罐罐。
Patreon新增內容《開市前速報》，七日免費試用：https://www.patreon.com/join/cbbcwar
