【Now財經台】樓市「撤辣」後理應對換樓客有利，但實際似乎只係短暫地帶旺部分新盤。「撤辣」後1個月一手成交逾4000宗，但4月就只有1000幾宗。「撤辣」後購買力似乎後勁不足，係咩原因？
成家網上投資課程導師徐冠鴻認為，第一個月嘅數據主要係因為「水壩效應」，過去1至2年積存好多想買樓、但希望睇定啲嘅投資者，「撤辣」後就即刻出嚟入市。2023年時，平均每個月一手樓成交不足1000宗，但「撤辣」後第二個月仍然有可能達到2000多宗，相比之前仍然強勁，始終無可能都好似3月咁旺。佢認為目前樓市成交增加，以將軍澳二手市場為例，本月截至17日成交有170幾宗，預計到4月底會有300多宗，只係相比3月少20%。
