【Now財經台】美股人工智能(AI)股及晶片股上周五(19日)出現小股災，其中超微電腦(SMCI)重挫23%，連帶英偉達(Nvidia)都跌穿800美元。市場認為因為超微最新新聞稿無預先公布財務表現，但以往有7個季度都會喺業績發布前公布初步業績，令市場有揣測。今次回調喺因為板塊繼續透支未來業績？AI股自去年以來，每次調整都好快會重拾動力，今次會調整幾耐？
長發資產管理董事馮時煖認為，回調主要因為美股今年升幅好犀利，納斯達克指數中Nvidia等相關股份升幅更勁，但過去連跌5至6個交易日，睇返今年初至今指數回調比較厲害。不過兩隻股份之前都有超買情況，依家市場可能認為面對地緣政治及估值問題都需要理性，相信過去幾個交易日明顯有相關股份大量獲利盤。
佢相信，超微4月30日公布業績表現難勝預期，管理層唔提前報喜相信係想投資者理性啲，回調屬於正常。至於回調幾耐，馮時煖就認為投資者唔需要心急，一般都會沉底一段時間，特別一啲價值重估股份，需留意有無成交額配合，有支持再考慮撈底。
