【Now財經台】太平洋航運(02343)今日(19日)喺航運股板塊中跑出，股價一度大升約10%，集團昨日(18日)公布，首季小靈便型乾散貨船日均收入跌，更破天荒公布首個股份回購計劃，涉資最多4000萬美元，管理層話，股價反映唔到真正價值及業務前景，到底太航首季營運數據有冇亮點？
紅蟻資本投資總監李澤銘指，第1季乾散貨運費顯著復甦，主要有兩個原因，首先係兩條航運要道，分別係巴拿馬運河及蘇彝士運河都有阻塞情況，其次係上游資源價格上升，尤其中東局勢升級令升勢加劇，令乾散貨行業受惠。
Alan又話，乾散貨船隻同集裝箱船隻有好大差別，因為乾散貨船隻經歷咗比較長嘅低沉期，好多船廠都唔願意造新船，令運力供應非常有限，所以當需求復甦，就會推高運費，因此，股價喺未來一段時間應該有相對樂觀嘅表現，但唔建議現價買入，可以睇下有冇機會落返2.5元水平再買貨，目標價可以定喺2.8元至3元。
