【Now財經台】國際貨幣基金組織(IMF)發表1年兩次的《政府借貸報告》，對美國及中國兩大經濟大國作出嚴厲批評。報告指出，美國及中國持續提高債務對國內生產總值(GDP)嘅佔比，按現時兩國嘅財政政策，IMF估計，至2053年兩國嘅公共債務將會接近倍增，高借貸不利打擊通脹，利率高企更會造成溢出效應，令其他國家要承擔高昂嘅利率開支，令全球出現貨幣緊縮狀況，增加全球經濟風險。
資深銀行家劉卓衡指，美國及中國嘅債務問題唔同，美國債務相當於GDP近130%，第2次世界大戰時期都冇咁誇張，預期美國今年要支付近9000億美元利息，要減低債務，但喺支出及收入都難作出大變動下，減息係最簡單直接地嘅減輕負擔嘅方法。
至於中國政府嘅債務就佔GDP逾70%，負債率唔算太高，劉卓衡認為透過財政政策減債有局限性，但減息可以再進取啲，人民幣嘅國際化進程仍然係一條漫長嘅路，減息對其影響未必好大，相反，減息令人民幣匯率低咗，影響出入口貿易，令收支更加平衡，有利於內地經濟。
