【Now財經台】聯儲局主席鮑威爾(Jerome Powell)周二(16日)指，抗通脹進度麻麻，暗示要再推遲減息後，聯儲局最新出爐嘅地區經濟報告顯示，美國大部分地區經濟增速2月底開始略為加快，企業對今年稍後嘅經濟表現偏向樂觀，似乎反映美國經濟乃仍然強勁，似乎冇減息迫切性？
高富金融集團投資總監梁偉民指，過去幾個月美國經濟數據理想，離衰退愈來愈遠，減息迫切性的確細咗，呢個情況會維持幾耐，係幾時開始減息嘅重要因素。
市場開始估計美國今年未必會減息，其中，美國銀行預期聯儲局最快明年3月先開始次息。不過，花旗認為聯儲局官員其實唔係咁鷹，又指今年仍有機會減息5次。
Wyman指出，減5次息唔係市場主流睇法，但唔排除美國經濟下半年有機會失控，導致聯儲局加快減息步伐，喺6月開始減息，但睇返依家嘅情況，雖然美國經濟下半年可能轉弱，但喺兩至3個月內出現好大問題嘅機會唔大，唔足以迫使聯儲局大手減息。
佢又認為，上述兩個種預測都未必會發生，仍預期美國今年減息1至兩次，首次會喺9月，11月或12月會再減。
