【Now財經台】英國今日(17日)出咗最新通脹數據，雖然3月消費物價指數(CPI)升幅收窄，但仍高過預期，英鎊略為轉強。英倫銀行行長貝利(Andrew Bailey)昨日(16日)暗示英國可能早過美國減息，又話英美通脹情況唔同，當地通脹壓力已有所紓緩，剛出爐嘅CPI正好支持貝利講法，英國早過聯儲局減息嘅機會係咪好大？
東亞銀行財富管理部高級投資策略師黃燕娥指，英國整體經濟仍然疲弱，加上當地經濟唔及美國穩陣，所以隨著美國推遲減息時間，英倫銀行亦表明未必會跟美國嘅減息時間，甚至會快過美國。佢又指，由於英國通脹持續降溫，唔排除英國會快過聯儲局減息。
Angela續指，睇返最新利率期貨，英倫銀行可能喺8月或9月減息，聯儲局可能推遲至9月或12月，短期會對英鎊構成壓力，英鎊暫時喺1.235水平會有支持。
