【Now財經台】美國10年期債息升至近4.7厘水平，事關聯儲局主席鮑威爾(Jerome Powell)同副主席傑斐遜(Philip Jefferson)都暗示或要推遲減息步伐，指去年底起抗通脹缺乏進展，愈嚟愈多券商下調今年減息次數預測，其中，瑞銀預期今年減息兩次後，明年有機會掉頭加息。
雖然金價仍處於每盎司2380美元水平嘅高位，不過，潤淼資產管理董事盧志威認為，後市10年期債息有機會上到5厘，長遠不利金價走勢，加上中東局勢繼續升溫，最新以色列明言會報復伊朗，短期金價未見進一步動力向上，建議投資者趁而家市場氣氛好就適量減持黃金。
