【Now財經台】內地今早(16日)公布首季經濟增長5.3%，好過預期，不過，睇返暫時已經出咗3月宏觀數據，僅製造業採購經理指數(PMI)持續改善，外貿、新增貸款、廣義貨幣(M2)供應等數據都差過預期。雖然出口數據受高基數高影響，但同期台灣及南韓出口都錄得增長，內地就按年跌7.5%，3月嘅宏觀數據會唔會令市場擔心內地經濟再有下滑風險？
滙豐環球私人銀行及財富管理亞洲區首席投資總監范卓雲表示，現時內地經濟仍面對通縮威脅，加上工資增長滯後，由於民眾對工作保障仍有憂慮，令銷售增長受阻，亦比市場預期慢，依家市場仍期待「兩會」之後，政府要加大力度谷內需，見到政策焦點係落喺固投方面，但始終消費係帶動經濟增長相當重要嘅推動力，所以整體經濟要有更強嘅增長動力，先可以帶動工資回復至一個較理想嘅增長速度，繼而進一步改善消費動力。
