【now.com財經】如常的起身做好朝早嘅《開市前速報》&同戰友們睇咗今日嘅街貨圖、走勢圖兼揀定貨之後，收到個Msg來自遠在加拿大嘅舊同事阿柱，話收到我鉤嘅比卡超公仔(佢至愛)，只不過被佢個女據為已有，掛咗喺書包度返學。哈哈，收到就好啦；搭單條頸巾你話啱用就更加好啦。
今早恒指再向下碌多200幾點，落到16,367點，日線圖上見指數失守最後嗰兩條平均線，不過，尚算仲有個「長方形」底線接住指數，水平大約係16,34X點呢個位；所以今朝喺作戰室都講明追淡倉見線好啦。又線位同現價都唔係話差得遠，依家9點40分，開咗市10分鐘見指數未能企穩16,400點樓上，即拉盡得60點左右。
等等下，見指數喺五分鐘圖上都有啲下影線出到，喺未企穩16400點之前作戰室亦膽粗粗先比小注好倉試住水溫先。
港股咁悶，試下搵個股著數，呢期除咗Bitcoin之外，以我個Patreon第二最多人問過嘅就係黃金。係嘅，嗰邊發一粒彈，金價就即飆，由之前咬住喺每盎斯1,900至2,000美元咁上下，一下子飆到掂過每盎斯2,400美元，雖然大家同香港小姐嘅願望都係一樣想「世界和平」，但金價咁升法...你睇下今日隻SPDR金ETF(02840)先啦。
除咗可以直接買SPDR金ETF之外，佢都有輪嘅，不過啲金價上到咁，啲價外Call都得返7隻咁大把，其中S金Call(24063)，行使價1,778.27元，同現價有3%價外，引伸同槓槓適中，不過呢個比較難做Day Trade，用日線睇的話，試下等佢回唔回落去10線企好之後先至出手。
作者阿珊，以技術分析專心玩輪證，唔貪心，努力賺取我家肥貓罐罐。
Patreon新增內容《開市前速報》，七日免費試用：https://www.patreon.com/join/cbbcwar
