【Now財經台】美股上周錄得爆發銀行危機以嚟最大單周跌幅，上周五(12日)有多家美國銀行派咗成績表，其中，摩根大通(JP Morgan)今年淨利息收入展望令市場失望，美銀行業轉弱會唔會影響港銀？
星展銀行(香港)豐盛私人客戶執行董事鄧威信認為，銀行板塊表現係反映對息口嘅預期，雖然近期市場對聯儲局減息預期降溫，但息口見頂都係大趨勢，加上聯儲局下半年減息仍然係主流睇法，銀行息差必定會收窄，繼而影響淨利息收入。佢又指，若市場繼續price in經濟將會「軟著陸」，對銀行業績會有影響，因為經濟放緩或導致貸款增長放緩，影響盈利。
鄧威信續稱，相信本港銀行股都會受呢種氣氛影響，但唔同銀行都有自身嘅經營情況及策略，例如滙豐控股(00005)最近都不斷出唔同市場嘅非核心業務，以及表現麻麻嘅業務，隨著自身經營因素改善，市場對股份未來嘅睇法或會好轉，至於另一隻金融股友邦保險(01299)股價近期大跌，主要受保單利潤率下跌拖累。
