【Now財經台】國際金價喺今日(12日)亞洲交易時段進一步逼近每盎司2400美元，金價已連升4周，是去年1月以來最長升浪。中東及俄烏緊張局勢帶動避險需求，加上環球央行增持黃金，都支撐金價表現，但金價升得咁急，短期會唔會出現調整？
光大證券國際環球市場及外匯策略師湯麗鴻指，近期金價走勢非常強勁，但14天相對強弱指數(RSI)已升至83嘅超買水平，理論上會出現技術調整，雖然近期美國經濟數據強勁，美匯指數再度升穿105，但金價回調幅度唔大，估計金價有力挑戰2500美元，除非失守2300美元呢個支持位，先會跌穿上升軌，出現大調整，但由於依家仍有唔少投資者揸黃金抗通脹，所以暫時仍睇好金價升勢。
Kimmy又話，要留意下周一(15日)美國公布嘅零售銷售數據，如果表現欠佳，到時美元回落會支持金價向上，亦要留意地緣政治因素，不過，即使金價出現調整，幅度都唔會太大。
