【Now財經台】美國周三(10日)出爐嘅3月消費物價指數(CPI)爆冷超預期，令美國10年期債息衝上去年11月以來高位，高見4.5厘，而昨晚(11日)公布生產物價指數(PPI)後，仍企穩4.5厘水平以上。英國資產管理公司施羅德(Schroders)最新估計，美國10年期債息今年有機會重上5厘，因為美國通脹仍然膠著，預期聯儲局將以「更逐步」速度減息，但亦唔可以忽視唔減息嘅可能性，施羅德話可以沽空美國2年、5年及10年期國債，但一般投資者喺今年餘下時間應該點部署美債？
利達LW基金首席投資及ESG策略師黃耀宗認為，暫時唔建議沽美債，因為市場都等緊喺第2季吸納美債，既然依家有水位，預期息率已經到頂峰，加上加息機會唔大，除非聯儲局主席鮑威爾(Jerome Powell)忽發奇想，有「推冧」經濟嘅諗法，否則，唔建議沽美債。
Andy又話，如果唔怕高風險嘅小投資者想博加息，不如直接部署交易所買賣基金(ETF)。
