【now.com財經】噚日喺下半場先嚟揀咗隻恒指牛(54805)出嚟，無計，成個朝早都唔郁，喺去到下半場一開市之後先至發力上，以噚日Patreon出文時間1點48分，如常用10分鐘作為睇文的話，即於1點58分再睇返個走勢圖，喺五分鐘圖上其實已經見指數做完當時嘅Day High之後向下回，無嘢嘅，因為有講底係話要等線企好之後先至偷位出動，所以呢啲時侯反而係比耐性同眼力去等。
去到2賠15分左右，指數高位向下行回落到中軸稍低水平後，未見佢再向下衝，過多10分鐘先指數有開始重上中軸線嘅情況，偷步比(54805)可以，如常的用返10分鐘作為買貨時間的話，則於2點25分至2點35分出隻(54805)，期內高低位做過0.047元/0.043元，平均買入價則為0.045元。
其實用嗰10分鐘去落場期間已經見指數成功重爬中軸之外，且生出嚟嘅燭都唔細支，的確有少少硬追，所以唯有留意住保歷加通道口有無拓闊，如果有，咁硬追嘅同時佢亦有空間比指數再上，咁就問題唔大；相反，如果保歷加通道只係保持住平衡狀態的話，咁就要有心理準備見指數可能只係借頂線至中軸做Swing，隨時呢頭入，嗰頭走。
呢注(54805)嘅情況就係咁，保歷加通道唔單止平衡，仲係收窄；再加上喺2點40分同2點45分高位同見17141點嘅「平頂」，連Slow STC(14.3)都已經拉到上90以上嘅嚴重超買位，(54805)都差不多要走，如果唔到指數同Slow STC(14.3)觸發觸頂向下就麻煩。
以2點45分見「平頂」兼保歷加通道口保持收窄時起計走(54805)期內高低位做過，0.048元/0.045元，平均走貨價為0.0465元，呢趟快入快出平均有1.5格或3.33%。係嘥氣架，但總好過無厘頭守到收市變輸。
今朝見恒指向下再跌116點，報16,978點開市，嘩！如果噚日隻(54805)再死守唔走，今日真係Lunch份A餐變麵包。
依家9點38分，指數低開後高走再回返落去接近 開市水平，作戰室先淡後好爬格仔已經完成動作。
至於喺小時圖上見指數目前只係留返條上影線喺中軸線之上，燭身已經低於中軸線，Slow STC(14.3)兩線向下，保歷加通道口亦見收窄，仲有大約16分鐘就10點，如果10點之後指數喺小時圖上係確認得到低走於中軸的話，恒指熊(65072)，收回價17,368點，同現價有約380點距離，槓桿約48.51倍，希望可以做到佛系注。
作者阿珊，以技術分析專心玩輪證，唔貪心，努力賺取我家肥貓罐罐。
Patreon新增內容【開市前速報】，七日免費試用：https://www.patreon.com/join/cbbcwar
