【Now財經台】舜宇光學(02382)噚日(9日)出咗3月出貨量數據，股價今日(10日)一度升逾5%，高盛指，上月增長勁係受惠於低基數效應，如果將首季同去年第4季比較，增長其實麻麻，3月及第1季嘅出貨數據又收唔收貨？舜宇今年另1個憧憬係三星(Samsung)嘅人工智能(AI)手機S25，三星係舜宇大客之一，S25又幫唔幫到舜宇？
紅蟻資本投資總監李澤銘指，第1季係傳統淡季，加上大部分品牌嘅旗艦手機都會跟iPhone喺9月出新機，所以下半年嘅數據一般比上半年好，所以今年首季表現差過去年第4季係合理，反而首季手機鏡頭出貨，按年或按月都較去年同期顯著上升，反映全球手機出貨量及廠商對第2、第3季嘅態度都係正面。
Alan又話，AI手機係新科技，會令換機周期縮短，所以會對舜宇有幫助，但佢提醒，由於新手機嘅主要戰線係AI芯片或相關聲學原件，令焦點由鏡頭轉移至AI功能，唔再著重鏡頭升級，呢方面係對舜宇不利。
