【Now財經台】美國商務部近日宣布向台積電(TSMC)提供喺美國再建廠補貼，另一方面，市傳華府下星期亦會落實向南韓三星(Samsung)提供補貼，用於喺得州興建晶片廠。上周台灣大地震一度令當地晶片廠部分生產線停運，當中包括台積電。美國先後向兩大晶片代工龍頭提供巨額補貼，係咪某程度上反映各國，尤其係美國，必須強化本土晶片供應鏈？
易方資本助理基金經理王逸研認為，美國向台積電及三星提供巨額補貼，相信其中1個原因係希望扶植本土廠商，呢個亦係美國政府最希望做到。目前，美國喺軟件方面較為領先，設備方面亦喺全球有重要影響力，不過，生產能力相對不足。
佢又指，天災及地區衝突或令部分地區嘅供應緊張，不單影響先進製程嘅晶片，部分成熟製程嘅晶片亦會受影響，由於美國依家都比較依賴環球廠商嘅供應，相信呢個係向台積電及三星提供補貼嘅關鍵。
