【Now財經台】截至早上11時止，1小時內《彭博》用戶搜尋量最多港股，依次為新奧能源(02688)、澳博控股(00880)、長城汽車(02333)、世茂集團(00813)、歐舒丹(00973)。
中信里昂最新上調今年澳門賭收預測，但輕微下調賭股EBITDA預測，今日(9日)上榜嘅澳博股價已連升第6個交易日，逼近250天線，跑贏銀河娛樂(00027)、金沙中國(01928)，到底炒緊乜嘢？
大華繼顯執行董事梁偉源指，澳博一直大幅落後其他賭股，近兩個月先追返上嚟，依家股價上返去年10月高位，雖然近年市佔率、賭收表現唔算特別好，但因為大市氣氛有改善，農曆新年及清明節假期開始，旅遊相關概念股份表現唔錯，旅遊收入增加，資金就追入相對落後嘅澳博。
至於賭股揀落後還是藍籌，Steven就話，金沙及銀娛近年表現唔突出，賭收及市佔率唔及永利澳門(01128)、美高梅中國(02282)，如果見唔到有改善跡象，都建議投資者揀返永利及美高梅。
