【Now財經台】昔日嘅醫療器械明星股微創醫療(00853)，已連續4年蝕錢，股價跌足3年後，今年暫時累跌17%。微創最新公布，為償還2026年可換股債券(CB)未償還款項，逾4.4億美元，跟原貸款人定立可換股融資協議，可換股融資淨額最多1.95億美元，年利率5.75厘，換股價7.46元，較上周五(5日)收市價有逾10%溢價。
《香港股票財技密碼》作者梁杰文認為，微創呢個動作有啲矛盾，如果正面去睇係公司未雨綢繆，擔心高息環境持續，趁現時平穩發展贖回部分CB，但奇怪的是，協議條款唔算特別優待。
另一方面，借款人除咗微創投資者高瓴外，亦包括集團主席及大股東，呢個可能小股東未必樂見，因股價跌可以賺息，股價升就可以賺多份，當中涉及利益衝突，所以係一單關連交易嘅主因。
點解貸款人會接受呢個協議？內媒指係為咗自救，Mike就認為，若從陰謀論角度出發，訂立可換股融資協議，可將股價控制喺現時偏低水平，雖然CB行使價同現價比較有溢價，但只要股價自現時6元水平嘅低位反彈，當中嘅浮動利潤已經好龐大，因此，唔止高瓴想加入協議，附屬公司嘅管理層都可以加入成為貸款人，只有投資者或小股東唔可以加入，若某日微創股價突然回升，訂立可換股融資協議就變得合情合理。
