【now.com財經】噚日揀咗隻恒指牛(54262)，平均買入價為0.045元。去到下半場都知個市同隻蟹一樣橫行為主，所以諗定只要保歷加通道口唔拓闊，都仲有啲機會可以等返Slow STC(14.3)上返超買位然後搵位走人。
呢一Round都算等得耐，去到下晝3點打後先至見返指數重上保歷加中軸樓上，再比多15分鐘Slow STC(14.3)千辛萬苦地終於爬上70邊皮位置，諗住可以有得再上之際，結果差不多整個3點鐘條Slow STC(14.3)喺70呢個位定格，Day Trade唔過夜為習慣做法之下，唯有喺完場前如常用10分鐘走貨。
按3點50分至4點期間，(54262)高低位做過0.038元/0.035元，平均走貨價為0.0365元，估唔到被佢磨到第二季開局第一注平均輸8.5格或18.89%，真係激氣；不過算啦，都仲有成個月時間，慢慢追得返嘅，最緊要心態得以保持，心態決定境界。
今朝如常同作戰室戰友喺未開U之前睇定今日牛熊街貨圖，見隔晚ADR都只係跌25點，依家等緊完U，見期貨都係只有十幾點跌幅，心知今日都係以悶為主。最終9點20分開跌4點，報16,926點。
開市後都見指數有少少浮沉，不過阿市今日都決定得幾快，用咗一分鐘時間即刻出支陰燭出嚟，淡倉比出之後見指數再向下跌過百點，雖然同第一層牛證16,600至16,699點都仲有成條街嘅距離，但方向啱就得啦。
如常的睇呢個專欄嘅你，我哋用返小時圖去做Trade。喺今朝首半個鐘見指數於小時圖出下影線踩住10線，Slow STC(14.3)兩線保持向下，而保歷加通道目前仍然向上中。情況有同噚日一樣，其實都係等緊指數同Slow STC(14.3)行Swing，只係問題在於指數係借保歷加頂線同邊一條線去行Swing啫，10線最近當然係首個testing嘅線。
10點打後再睇小時圖，見指數低於10線，基本上恒指熊(65228)，收回價17,230點，同現價有約380點距離，槓桿有約35.1倍夠做Day Trade，用返住小時圖嘅10線作為上方量度線可以，同步留意住五分鐘圖依家保歷加口拓闊中，指數都keep到向下行但有少少步履蹣跚，但如果佢可以keep住喺保歷加中軸以下水平向下運行落去的話，咁(65228)都可以繼續借小時圖做佛系嘅。
作者阿珊，以技術分析專心玩輪證，唔貪心，努力賺取我家肥貓罐罐。
Patreon新增內容【開市前速報】，七日免費試用：https://www.patreon.com/join/cbbcwar
