【Now財經台】截至早上11時止，1小時內《彭博》全球用戶關注度上升最多首5隻港股，依次為世茂集團(00813)、百威亞太(01876)、長城汽車(02333)、金沙中國(01928)及紫金礦業(02899)。
排榜首嘅世茂早前未能支付10億美元離岸債嘅利息及本金，價值117億美元嘅海外債務全數被視為違約，最新遭建銀亞洲入稟清盤，涉資約16億元。世茂連16億元都搞唔掂，係咪反映內房真係好難撲水？世茂今朝(8日)冇停牌，股價低開後，愈跌愈多，一度瀉逾15%，後市係咪會繼續捱沽？
富昌證券聯席董事譚朗蔚指，內房喺資本市場嘅融資渠道已相當有限，雖然有內地嘅銀行貸款等支持政策，但僅限於項目層面嘅保交樓，唔包括公司層面嘅還債、解決違約等事務。市場擔心世茂難撲水，出售資產可能係其中一個出路，但睇返過往其他例子，似乎都未必比到市場好大信心，而股價今日急瀉都反映咗呢點，投資者都不宜再去撈底或做投機部署。
