【Now財經台】中東地緣局勢持續緊張，繼續推高油價，不過，中海油田服務(02883)股價今日一度急瀉逾20%，事緣集團周三(3日)晚出通告，指有中東客突然要暫停4座鑽井平台作業，但冇講原因。早前，沙特阿美(Saudi Aramco)決定削減最大可持續產能，上月底其他同業已受影響，要叫停中東幾個鑽井，中海油服嘅情況係咪好嚴峻？
紅蟻資本投資總監李澤銘指，其實沙特限產、停產已一段時間，油價持續高企主要係俄羅斯聯同石油輸出國組織(OPEC)自願減產，但削邊個產能未到最後都唔知，所以中海油服可能係突然被通知要暫停作業。
Alan表示，由於消息來得好突然，好多細節都冇交代清楚，包括停產幾耐，加上油服公司一般會同油企間應該簽咗長期服務合約，中間可能涉及賠償條款，但最終係咪會執行仍然係未知數，亦未有提及停產期間油企會唔會有補償。
佢續指，如果無限期停產或冇補償，相信無可避免會影響收入或成本，所以市場有負面反應都好正常，但佢提醒，油企要減產先可以推高油價，所以油服公司本身就好難受惠於高油價帶嚟嘅好處。
