【Now財經台】華晨中國(01114)全年收入按年持平，盈利就增長8%，全年毛利率升近5個百分點，公司發通告指，將會喺4月中宣布派特別息。其實去年完成出售華晨寶馬25%股權，公司已兩度派特別息，分別派0.96元，今年派股息後，股價係咪難有支持？集團賣埋餘下嘅華晨寶馬25%股權機會大唔大？
華盛證券財富管理部董事李偉傑指，母企華晨汽車集團嘅債務問題，會令華晨賣埋剩餘嘅華晨寶馬股權機會大增，依家母企持有華晨29.99%股權，變相日後唔使賣華晨寶馬股權，而係成間公司賣盤。佢又話，市場短期會關注再派特別息會唔會推升股價，如果未來計劃出售華晨寶馬餘下股權，華晨股價有機會再上，因為到時會有更多現金派特別息。
不過，Jason唔建議投資者高追華晨，因為公司仲有好多不確定性，不妨等股價調整至10天線水平，即約5.5元，睇下消息面有咩變化再做部署。
