【now.com財經】四日假期過後今日返工，係咪有啲假期後症後群呢？不過嚟緊星期四(4月4日)都係紅日，即係話今個星期其實只有三個交易日，應該都有唔少人會拎埋呢三日將個假期槓桿槓到一連放10日，諗起都爽。
更爽嘅係今日恒指開市升270點，開市報16,811點，作戰室好倉順U盤方向追出，開市後6分鐘已經有戰友進行格仔收割。
嚟到依家10點，指數目前仍然咬住高位水平，五分鐘圖上見指數喺暫時見嘅高位16,991點向下稍回，反手淡倉作戰室亦都出動，不過，睇呢個欄嘅用開小時圖去做，就專注用返個小時圖去睇走勢。
小時圖上見指數今日首兩支燭都見下影線，但高位相差10點(截至10點18分止)，所以唔係「平頂」，同時由於下方未有平均線上到嚟，所以唯有借高位拉出量度線先，借一借3月22日開市下跌裂口頂部16,840點作為下方量度線的話，其實都同現價有啲遠，高位借3月21日下半場出嘅「平頂」位16,939點都得嘅，反正依家保歷加通道口仍然拓闊中，Slow STC(14.3)兩線向上仲未到超買位。
恒指牛(54262)，收回價16,618點，同現價有約330點距離，槓桿有約41.34倍，為市場上最貼價嘅牛證之中槓桿最高，Day Trade好啦。等等指數爬得返上小時圖剛剛mark住嘅16939點樓上企好出動，睇下Slow STC(14.3)可唔可以食埋嗰少少上到超買水平啦。
BTW，下個星期一重新於新城財經台下午做節目，簡單啲做返一part仔嘢先啫，放心，姨姨身體仲頂得住嘅。
作者阿珊，以技術分析專心玩輪證，唔貪心，努力賺取我家肥貓罐罐。
Patreon新增內容【開市前速報】，七日免費試用：https://www.patreon.com/join/cbbcwar
