【Now財經台】嗶哩嗶哩(09626)(B站)係今日(28日)升幅第2大科指成分股，股價一度炒高近10%，高見89.7元，收市仍升逾8%。
B站噚晚出咗去年業績，虧損按年收窄35%至48.2億人仔，單計第4季，收入係4個季度之中最多，期內，淨虧損按年、按季都有改善。艾德金融聯席董事陳政深認為，除咗業績有進步幫到股價，廣電總局最新發言亦令市場憧憬中央會放寬對影片同直播平台嘅限制，當局提及，短視頻及直播係平台企業融入不同行業嘅有效渠道，要實現線上線下持續聯動，打造更多消費場景。
股價方面，Ryan分析指，B站喺3月初升穿80元水平，即50天線嘅關鍵支持位後開始反彈，喺約90元水平嘅100天線面對頗大阻力，而且盈利前景亦有兩大隱憂：平台內容以長影片為主，跟唔上而家嘅消費習慣，加上業務較難拓展到國外，認為唔值得現價入場追落後。
