【Now財經台】美股季結前夕，3大指數今季暫時累升5%至10%，其中，道指昨日(27日)收市大升477點，距離40000點大關不足1%，標普500指數就再創收市新高，有望成為2019年以來表現最好嘅第1季。
不過，美股首季強勢會唔會延續至第2季？據美銀最新報告顯示，美股基金上周合共錄得220億美元贖回，係2022年12月以來最多資金流出嘅一周，反而全球債券基金就錄得54億美元資金流入。此外，高盛指，機構投資者喺季結過後或要對投資組合進行再平衡，預料養老基金或賣出約320億美元股票。
鴻鵠資產管理行政總裁陸庭龍分析指，上述資金流出嘅數據唔算好大規模，認為美股今季未出現重大調整，傳統基金趁季結前高位獲利回套屬正常，相信個別龍頭股份跌勢只係受累於短時間內集中嘅沽壓，預期美股短期仍有減息因素托住。
