【Now財經台】日圓匯價今日(27日)曾跌至151.97兌1美元，創1990年來最低水平。日圓弱勢未止，當地財金官員亦不停出口術，日本財務大臣鈴木俊一連續第2日放風，指必要時會喺匯率問題上採取大膽行動，令日圓跌勢稍為轉強至151.3水平。
東亞銀行財富管理部高級投資策略師黃燕娥認為，依家日圓跌幅唔算大，加上當地經濟面仍然疲弱，暫時未見日央行需要持續加息嘅條件，相信官員只係象徵式口頭干預。
Angela續指，上周瑞士央行(SNB)出乎意料減息亦影響市場預期，有風向吹緊美國聯儲局可能會再延後減息，投資者或因此認為美日息差短期冇收窄跡象，令日圓市場上周起出現「賣出事實」(sell the fact)拋售。佢預期，日圓兌美元短期或會跌破152水平呢個支持位，但相信中線會回升至150水平。
