【Now財經台】截至早上10時45分止，1小時內《彭博》用戶關注度上升最多港股，依次為美團(03690)、中國鋁業(02600)、中國人壽(02628)、中國石油化工股份(00386)及紫金礦業(02899)。
美團上周五(22日)公布業績後，股價今日(25日)大升，一度高見96.8元，大升近10%，仲補埋去年底裂口，業績提及會策略調整，係咪呢點令市場有憧憬？美團市盈率(PE)逾20倍，貴過騰訊控股(00700)、阿里巴巴(09988)等，但美團業務瓣數多，估值係咪更吸引？
富昌證券聯席董事譚朗蔚指，美團3月初開始炒上，市傳一直蝕錢嘅社區團購業務可能會剝離，而業績亦顯示呢項業務係帶嚟負面影響，但集團未來有機會重新聚焦本業，即外賣及到店服務等，呢啲都有唔錯嘅增長。由於市場繼續憧憬美團會「鏟除毒瘤業務」，預期股價會維持震盪強勢格局，又認為，短線有機會挑戰去年11月底裂口。
Stevan續指，雖然騰訊及阿里估值相對較平，但ATM嘅業務唔可以完全一致比較。佢認為，依家大市氣氛較前兩個月前明顯有改善，若ATM業績唔會特別驚嚇，股價向下機會唔大，反而要留意回穩後，資金會唔會再追入。
