【Now財經台】金價上周創新高，一度衝上每盎司2200美元，係咪同市場認為美國聯儲局對減息態度偏「鴿」有關？金價今年首季累升約5%，市場預期，美國6月有機會減息，係咪愈近6月金價就愈有向上動力？
金銀業貿易場理事長張德熙認為，聯儲局今年係咪減息3次仍然係未知數，最近嘅地緣政治及貨幣貶值等因素，抵銷咗聯儲局上一輪加息壓力，加上其他投資產品如債券、房地產等，過去幾年都比較低迷，就輪到貴金屬抬頭。
佢續指，金價升幅加快主要同地緣政治因素有關，加上中東國家通脹高企，令黃金喺其他投資產品低迷下，進一步凸顯保值功能。早前，張德熙估計，金價喺今年首兩季有機會見2300美元水平，但由於第1季已好接近呢個預測，所以調整預測為第2至3季會突破2300美元，並挑戰2500美元。
佢認為，美國減息已逐步逼近，相信聯儲局正式宣布減息，金價會稍作調整，之後就會開始衝高。
