【Now財經台】李寧(02331)去年少賺逾20%,又大削末期息60%,但全年股息按年增加18%,李寧股價今日一度炒高近8%,點解會出現呢個情況?2024年巴黎奧運會將會喺7月開幕,可唔可以帶動集團銷售持續改善?
獨立股評人沈慶洪指,雖然李寧呢份業績大數麻麻,但市場最關注嘅渠道庫存有改善,毛利率又維持到,呢兩方面都令市場有驚喜,加上派息對投資者嚟講一定係重要,集團增加派息可以吸引到投資者,呢3個就係股價今個升得唔錯嘅原因。
Patrick續指,李寧銷售情況有進一步改善空間及條件,因為李寧低潮已過,而庫存回落有利今年經營,加上內地表明要力谷內需刺激消費,所以未來需要留意政策層面上有冇新招數推出,如果中央再出手,對體育用品股呢類公司會有幫助,加上奧運年會刺激體育用品銷售,但另一方面,相關企業要加大推廣力度,所以要留意推廣開支及收入比例。