【Now財經台】有報道指，聯儲局今次議息會議會深入討論幾時及點樣放慢量化緊縮(QT)，局方2022年起，每月縮減資產負債表規模近1000億美元，最新已降至逾7.5萬億美元，睇返依家嘅情況，局方會唔會先停止「縮表」再考慮減息？值得留意係，美國商業房地產資產(CRE)問題導致銀行體系壞帳增加，呢個係咪停止QT嘅考慮之一？
東亞銀行首席投資策略師李振豪認為，聯儲局未必會減息、放慢QT等一齊做，按部就班去做嘅機會較大，相對於減息，QT嘅影響較細，而覆蓋企業及銀行正正係問題所在，如果能暫時放鬆「縮表」，等到6月、7月減息，呢個進程預測會比較合理。
佢又指出，QT規模相對於6萬至7萬億美元嘅balance sheet只係杯水車薪，要回復至疫情前嘅4萬億美元需時約1年，經濟係咪真係頂得住？加上今年係大選年，如果6月先開始減息，到11月大選前只有3次減息機會，係咪足以挽救下滑嘅經濟？相信聯儲局會基於政治考慮喺6月至7月減息，所以3月討論QT係好正常嘅預測。
