【Now財經台】截至早上11時止，1小時內《彭博》用戶關注度上升最多港股，依次為中國恒大(03333)、信達生物(01801)、福萊特玻璃(06865)、中國石油化工股份(02386)及友邦保險(01299)。
恒大主要子企恒大地產被罰逾41億人仔，恒大已停牌，旗下恒大物業(06666)及恒大汽車(00708)暫時1升1跌，主席許家印又被終身禁入證券市場，對依家仍持有嘅其他上市公司股權有咩影響？
富途證券高級策略師譚智樂指，其實唔會有太大影響，因為集團旗下公司大部分都有做債務重組及股權分割等，許家印被終身禁入證券市場，只係內地對違規、違約或信用評級較差嘅公司作出處罰，但對金融市場唔會有太大影響。
佢又話，其他冇停牌嘅恒大系股份交投仍然唔錯，估計今日(19日)上榜係因為公司有消息傳出，但其實呢類已確定違約嘅公司已經唔再係市場焦點。
