【Now財經台】APOLLO出行(00860)昨晚(17日)擬以每股0.46元，發4.45億新股予9名投資者，較上周五(15日)收市價折讓約10%，集資淨額1.63億元，將用作發展出行服務業務、還債及一般運營資金。APOLLO出行股價今日(18日)大幅高開近10%後，升幅一度擴大至29%，似乎反映市場對發新股集資都受落，但值得留意係，半日成交唔夠100萬元，應該點解讀呢個情況？
《香港股票財技密碼》作者梁杰文指，今次配股消息某程度上都係好事，因為係向公司第一大股東、街外投資基金及現有股東配股，令市場覺得公司揾到新投資者，或現有股東願意喺公司面對財務困難時願意加大投入完成今次配股，而配股後股權相對更集中。不過，現有股東及新股東都睇唔透公司發展前景，而大部分配股集資金額係用可換股債券對銷返，而新資金一半用嚟還債，僅6000萬至7000萬元用嚟發展業務，其實只係杯水車薪，可能市場擔心集資行動陸續有來，都會限制咗股價嘅反彈幅度。
