【now.com財經】上個星期五(3月15日)揀咗隻恒指熊(52324)出嚟，平均買入價為0.0585元，同步Set好以五分鐘圖10/20線為防守線。睇返恒指走勢圖，喺上個星期五下半場於1點50分見指數忽然出咗支大大地嘅「陽燭」，一口氣橫跨10/20兩線，同步亦響起(52324)走貨訊號。
如常的用10分鐘走隻(52324)的話，以1點50分起計即至2點期間，(52324)期內高低位做過0.064元/0.055元，平均走貨價為0.0595元。呢一趟都總算有驚無險，平均執返嚟嗰一格都被手續費溶埋。算啦，見之後指數雖然唔係一下子抽升，不過後期佢慢慢Un返上去，溫水煮蛙咁，隻(52324)唔覺唔覺去到收市時得返0.052元，證價仲低過走貨時最低個位0.055元。
今個星期被市場形容為超級會議周，事關美國、英國、澳洲同日本喺呢個星期都有議息會議，市場預期美國今Round應該都唔會減息住，皆因上個星期嘅CPI超出市場預期；而日本嗰邊又之前吹咗唔少風出嚟話日央行(BOJ)可能會宣布結束負利率政策，比較多大型不確定性因素出現而同時本周又會有答案喎，怕且今個星期都係食花生居多。
今朝指數開市都係微跌30點，到依家9點52分，其實指數都唔係變化好大，上上落落過之後依家見跌47點，跌16,673點。於日線圖上見指數於10/50線兩線之間；作戰室暫時只係搵咗個淡倉位偷出，但說實話出唔出都無乜所謂，反正出咗都唔知要守幾耐。
傷風未好，由上個星期喉嚨劇痛(多謝樓下藥房叔叔請我食涼果，等我紓緩喉嚨痛)，到依家喉嚨唔痛但變成打乞次同少咳，再加埋呢啲陰陰涼涼嘅天氣，唉，奉勸大家一句小心身體。
等到依家10點12分，指數都真係撚咗好耐都未有一個明確嘅方向出到嚟。睇日線圖見指數今日仍然企於10/20/100線之上，三線支持係強嘅，「上升通道」係未完嘅，只係Slow STC(14.3)未轉返向上啫。
但似乎今日都難定Day Trade去向，事實上等到依家10點39分見指數都仲有升20點，報16,741點，連小時圖都仲被10/50線夾住，我都係去飲格咳水，食粒涼果算啦。
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰室免費試用：https://www.patreon.com/join/cbbcwar
