【Now財經台】國際金價破頂後回落，並呈橫行格局，不過，倫敦期銅似乎好大機會突破每噸9000美元水平，早前市傳內地銅企密密減產，至於鋁價今個月都升返1%，有「中特估」(中國特色估值)概念嘅江西銅業股份(00358)、中國宏橋(01378)走勢都好強，中國有色礦業(01258)今日(15日)亦破頂，其他有色金屬股值唔值得繼續跟進，博股價再上？
註冊財務策劃師協會會長黃敏碩認為，現階段宜集中部署，唔好太多心，因為每隻有色金屬股都受需求、供應等因素影響，江銅及洛陽鉬業(03993)暫時值博空間較大，洛鉬本身做稀有金屬，幾乎係獨市生意，所以股價上到高位亦較大機會可以企穩。
佢又話，反觀宏橋主要從事跟鋁相關嘅加工，處於生產鏈較下游位置，所以好視乎定單量或經濟大環境，要升到7.5元可能有啲難度，因此，呢隻股份暫時可以先觀察，唔使心急入手。
