【Now財經台】日本有望結束負利率，當地「春鬥」談判結果今日(15日)出爐，估計今年薪酬增幅有望超過3%，將會係31年以來最高水平。工資上漲及結束負利率政策勢推高日圓，日本企業盈利會唔會受影響？若通脹重臨，日央行可能結束寬鬆政策下，邊啲行業會最受惠？
瑞聯銀行北亞股票業務主管林燕指，市場依家十分關注日本通脹，其中1個主因係會影響日圓走向，亦見到日圓係逐漸走強，並有進一步轉強空間，或升至146水平，估計未來年可以上到135水平。
佢又指，日圓匯價的確會影響部分日企盈利，但據調查顯示，只要日圓未升至130水平，企業盈利仍然可觀，回顧過去逾10年，日企盈利增長不足10%係受惠於日圓貶值，大部分來自當地經濟持續向好，以及邊際利潤(Profit Margin)擴張，反映日企去槓桿做得好好，相信可以抵銷到未來日圓升值嘅影響。
林燕又話，健康通脹水平約2%，若薪酬討論做到5%加幅，扣除2%通脹，若實際薪酬增長有持續向上，可為整體經濟帶來好好嘅財富效應，繼而帶起本土消費，因此，睇好同本地民生相關，以及能受惠於今次薪酬討論嘅行業，例如服務性行業等，若日圓有機會轉強，進口商表現亦可能跑贏出口商。
