【now.com財經】噚日見指數向下失守小時圖10線，於是將隻恒指熊(61149)比出，平均買入價為0.06元。仍然都係無Set目標價，自己正數自己數；但就比咗量度線出嚟，就係五分鐘圖嘅10線。
呢注持貨過半場至大約下晝2點25分，見指數於五分鐘圖上終於企上10線樓上，(61149)按策略都要起身。如常的用10分鐘作為走貨時間的話，即於10點25分至10點35分走(61149)，期內證價做過0.071元，呢一注平均有11格或18.33%；都係嗰句：係咪可以收工啦？
睇返噚日恒指收市口價，令日線圖條150線得而復失，前日講過借150線唔過兼喺線上出現「射擊之星」而比出嗰注淡倉，最後如果轉成用日線圖去Trade的話，噚日失嘅150線反過來可以Set為上方量度線，而下面就用返最近嘅平均線做量度線；以依家個日線圖睇就似可以用10線嘅， 唯大前題仍見日線圖嘅「上升通道」仍在，即使指數下行但仍然處於「上升通道」範圍內，所以如果對港股打算抱轉勢希望嘅，都可以繼續抱嘅。
噚日收咗市之後終於都走咗去睇我平時睇開嘅翁醫生，睇嗰陣時明明無咳無流鼻鼻，只係喉嚨痛，所以翁醫生都只係開咗啲喉糖同兩份消炎藥比我。過咗一晚今朝起身開始有咳同少少流鼻鼻，到底發生咩事？BTW你哋身邊係咪都係有人病咗呀？
終於都等到恒指開市，今早開市跌203點，報16,758點，日線圖上見指數裂口下挫，不過下望都仲有10/20/100線可以做到下方量度線支持；至於上方150線反過來做上方量度線可以；但如果今日先打算嚟做呢注淡倉的話，就真係要搵一搵位先啦。
仲有12分鐘先至到10點，見指數重新落返去今朝開市水平再低多少少，大家都等緊到底今日低位佢穿定唔穿，以依家恒指呢口價計，指數其實重新跑返落去靠近牛證街貨層，而首兩層牛證街貨夾埋都有相當於2,553張期指街貨，論投術走勢同街貨擺位，點都係似出淡倉著數啲，所以喺作戰室亦先以淡倉出戰。10點到步後指數向下跌穿16,700點，戰友收割進行中。
至於睇緊呢篇文嘅你，我哋都係用返小時圖啦。依家10點5分，指數已經回落到小時圖嘅保歷加底線，而Slow STC(14.3)兩線仍然處於超賣範圍，由於唔係拓闊關係，所以指數同Slow STC(14.3)係隨時都有機會出返Swing Trade走勢；換上平均線的話，咁你都可以話下方仲有50/100線同指數有少少距離，暫時仲未掂到嘅。但係咁呢個位就真係唔似出淡倉，唯有重新再等過。
恒指熊(52324)，收回價17150點，同現價有約379點距離，借五分鐘圖整條保歷加通道向下行嘅時侯，留意指數同Slow STC(14.3)出Swing嘅情況，進取嘅借指數唔過10/20線而出淡倉；安全嘅當然可以用返Slow STC(14.3)超買到步見觸頂後都可以嘅。
日線「上升通道」仍健在，指數都只係回調下啫，無事嘅。
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰室免費試用：https://www.patreon.com/join/cbbcwar
