【Now財經台】雖然361度(01361)恢復派末期息，去年就多賺近29%，但拆開上下半年睇，其實下半年賺少一大截，但收入未有大跌，只係銷售成本增加，下半年表現有冇令人失望？集團恢復派息有咩啟示？
博威環球證券金融首席分析師聶振邦指，睇返361度出完業績後嘅股價表現，反映市場係收貨，如果睇返往績，361度下半年嘅收入及盈利普遍少過上半年，所以市場都對下半年業績冇乜期望，不過，不論收入還是盈利增速，下半年走勢都好過上半年，令市場憧憬今年業務將會出現提速嘅情況。
此外，361度恢復派息，全年派息比率40%，帶動股息率去到約1厘，聶Sir就話，集團派息慷概反映管理層睇好今年業務前景，唔需要預留現金做撥備及周轉安排，市場會因而憧憬今年業務表現進一步提升，令派息亦有上調空間，暫時集團整體財務表現仍然健康。
