【now.com財經】久違了嘅17,000點終於返嚟啦！而噚日亦都喺上半場出咗隻恒指牛(51847)，平均買入價為0.0415元，皆因見指數喺上半場時段踩住五分鐘圖10線而上所以出好倉，是故同步都借返五分鐘圖10線作為下方量度線。
下半場開市後指數有向上再跳高多一級，然後Keep住慢駛但方向正確就無問題啦，大不了都係時間換格仔啫。去到噚日下午1點45分，指數終於重返17,000點，呢刻舊地重遊令到不知有幾多散戶喺地獄活過來咁滯，繼續持貨去2點20分，見指數失守10線水平，再過多五分鐘則見指數完全企於10線以下，響起咗(51847)嘅走貨訊號；又咁講，五分鐘之後恒指重上10線之上，呢一下真係可以當佢係叉錯腳。
Any肥，係過線就過線，策略亦都要嚴守，如果唔係呢頭Mark好晒位嗰頭又唔算數，大佬你叫人點跟你玩？以2點25分見指數失守10線而走(51847)，如常的用10分鐘作為走貨時間的話，即於2點25分至2點35分期間沽隻(51847)，按期內高低位做過0.069元/0.062元計，平均走貨價為0.0655元，呢一趟打跛腳勁袋24格或57.3%，我想問大家：3月打後嘅時間可唔可以唔交稿啦？
當然，噚日指數最後上到去17,100點樓上，連重貨熊17,000至17,099點都全數被收回，如果(51847)跣腳嗰下你無走到嘅，應該一日賺晒全個月嘅茶錢啦！都係嗰句：有正數落袋就開心啦！
噚晚同由台灣返港嘅舊老細威哥食飯，先多謝咖啡同Puzzle手信(興趣嚟啫，主要係1,000塊起標，屋企都有四、五幅掛緊喺牆)，再來嘅係噚晚餐飯仲要你埋單，嘿，我只可以同你講返句小心冷親，呢期好多人都病啫，噚晚我老家老爺出唔到嚟食飯就係咁解；到今日連我都開始個喉嚨有啲乾乾地。
指數今朝開市跌34點，見個小時圖就明，噚日最後粒燭出高位「十字星」真係唔多開胃；不過喺作戰室又好痴線地喺五分鐘圖見指數企住喺中軸樓上時出注試水溫試好倉，等下等下依家9點58分，指數一度上到17,173點，又唔係話升好多，但對比日線圖，指數同條150線博鬥中。
終於等到10點，即時開個小時圖update一下，見高位「十字星」有少少失靈，10線向上繼續追指數，只係整條保歷加通道呈上，有可能定住喺高位等10線上到嚟再借線去，不過Slow STC(14.3)兩線仍然保持向下，可能未必會搶到指數好低，但係都抱住隻淡倉等小時圖見Swing出現可以嘅。
恒指熊(67382)，收回價17,508點，同現價有約350點距離，依家10點8分見指數於五分鐘圖上重新落返去中軸以下水平，Slow STC(14.3)兩線勢頭向下，呢啲位淡倉出比唔係問題，要留意嘅係條保歷加底線有無向下再比指數落啫。
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰室免費試用：https://www.patreon.com/join/cbbcwar
