【Now財經台】截至早上10時45分止，1小時內《彭博》用戶關注度上升最多港股，依次為小米集團(01810)、華潤置地(01109)、萬科企業(02202)、中國電信(00728)及比亞迪股份(01211)。
小米創辦人雷軍喺微博宣布，小米汽車SU7將於3月28日正式發布，終於等到小米汽車推出，小米股價今日(12日)表現興奮，依家新能源車價格競爭激烈，市傳SU7定價約25萬至37萬人仔，定價係咪重點？有貨冇貨又可以點部署？
富昌證券聯席董事譚朗蔚認為，小米股價今朝大升近10%，主要係SU7終於落實幾時發布，令市場有憧憬，車價一定係重要，其實小米都預告由於成本高，SU7唔會賣得平，如果定價高，可能好似走中高端路線嘅理想汽車(02015)，一旦推出貴價車時，會比市場質疑銷量，加上電動車價格戰持續，連Tesla都要減價迎戰，尤其今次係小米頭炮，未做到規模經濟下，市場都會關注毛利率等，所以就偷步炒一轉先。
佢又指，小米今日扭轉咗去年12月中以來嘅跌勢，暫時可先睇14.7元，如果企得穩，就留意呢浸可唔可以炒到SU7面世為止。
