【now.com財經】噚日揀咗隻恒指牛(51494)出嚟，平均買入價為0.0445元，帶貨過下半場時諗住指數可以上得到去小時圖一早拉定嘅量度線，但可惜成個下半場指數都係保持橫行，就連等五分鐘見Slow STC(14.3)上去超買位，當借佢嚟做Swing Trade一趟算數但都做唔到。如果呢注好倉你買得唔大嘅話，膽粗粗過一晚夜，博今日指數可以繼續順住56K Loading嘅小時圖向上運行可以嘅，反正小時圖亦見保歷加通道口拓闊中。
不過，睇開呢個欄嘅你都知道我比較少過夜，通常呢啲等到收市前都無乜聲氣嘅，都會選擇臨完場前10分鐘處理埋佢就算。按此習慣去做的話，即於噚日3點50分至4點期間走隻(51494)，期內高低位做過0.05元/0.049元，即平均沽貨價為0.0495元，一計之下呢一注悶悶下平均賺幅都有5格或11.24%；呢個幅度夠我今晚同我位由台灣返嚟香港嘅舊老細威哥食餐飯，以前仲喺香港時一年都會見到幾次，雖然台灣係近，但之前一個疫情出現，變咗我哋幾年先至見一次。還好呢個地球都仲有網上購物呢個玩兒，好等我每年中秋都可以訂到盒禮送過去，繼續答謝佢當年推我呢個妹妹喺傳媒呢行成長。
呢個地球都仲有好多玩兒嘅，單係一隻Nvidia(NVDA)都已經夠大家玩，最近Nvidia股價上到900美元樓上，接近1,000美元呢啲大關口位惹來割韭菜出現亦屬合理，同步市場再傳有拆細之嫌，無他嘅，單純嘅拆細只係「方便」大家容易入場再炒過咁啫，基本因素都無改變到嘅；當年騰訊1拆5之後咪又係由10X蚊開始再炒過；咁當然之後嘅事之後先算啦。
等到恒指開市，今日見升114點，開市報16,701點，真係，如果噚日隻(51494)過咗夜嘅話，今朝開市即食就禾味；但都真係要食得快，事關指數喺開市1分鐘都唔夠已經出現高開低走，一度將指數嘅升幅壓低到得返廿點左右；「痴線要出動到1分鐘圖咁快？」係呀，你唔見呢幾日又開始回復返開市至11點期間個市係郁嘅，其餘時間都係打咁行咩？唔將個時間圖再較細啲，點咁可以喺嗰個零鐘裡面搵餐晏呀，作戰室開晒飯啦！
嚟到依家9點48分，指數借過1分鐘圖嘅10線兜底之後再上，依家重新上返去今朝開市水平之上，換一換個小時圖嘅話，見指數今朝粒陽燭嘅燭身已經處於喺作戰室Mark住嘅好倉目標範圍。10點未到恒指再創日內新高見16,809點，作戰室開餬都開得八八九九，首半小時已經完成今日要做嘅嘢，正數收割，之後佢橫行都話之佢。
至於睇緊呢篇文嘅你可能已經一早開咗好倉，甚至都同作戰室嘅戰友樣開咗牌；咁餘下落嚟仲有咩好玩呢，又借小時圖睇下有無得佛系一下。
嚟到10點3分見指數小時圖嘅保歷加通道口仍然拓闊中，即仍然有位比指數去行，只係呢一刻見指數未算可以企得到16,800點樓上，而Slow STC(14.3)兩線都上到90以上嘅嚴重超買範圍，有啲麻煩因為指數有機會喺等五分鐘圖嘅10線上到嚟之後，先至借五分鐘圖整條保歷加向上而用頂線&10線向上運行，所以依家呢個時間唯有等指數同平均線靠近返先至再有方向，當然搶到咁高而16,800點真係企唔到嘅，Slow STC(14.3)同指數出Swing觸頂向下亦屬合理，但只要日線圖上今日指數企得到上100線就安全啦。
Day Trade嘅都係睇返五分鐘圖10線同指數嘅反應好啲。踩得到線而小時圖保歷加通道口仍然拓闊嘅話，恒指牛(51847)，收回價16,438點，同現價有約317點距離，為市場上最貼價牛證之中最高槓桿(有約39.89倍)及最強成交。
反過來踩唔到的話，恒指熊(65444)，收回價17,120點，同現價有約364點距離，槓桿都有約37.23倍，當平時行一趟Swing算啦。
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰室免費試用：https://www.patreon.com/join/cbbcwar
