【Now財經台】抗流感藥股東陽光長江藥業(01558)今日(11日)復牌，股價創52周新高後，好快就倒跌近20%。公司上周五(8日)出通告，指集團擬進行重組，再由母公司廣東東陽光藥業以換股方式合併公司後，以介紹形式在港上市。
《香港股票財技密碼》作者梁杰文分析指，東陽光藥早於兩年前已鋪路重組畀母公司借殼上市，當時向母公司嘅控股公司出售手上約10%母公司持股。而東陽光藥去年中期虧轉盈，母公司仲蝕緊錢，而家同東陽光藥合併可以做靚盤數，以便通過上市聆訊。
雖然介紹形式上市唔涉及籌集新資金，但Mike認為，母公司研發創新藥嘅業務需要足夠現金流支持，可能會藉機集資或者日後向股東伸手。
不過，Mike話，如果母公司完成換股上市，東陽光藥嘅資產規模將倍增，值得憧憬集團市值增加後獲納入港股通，有「北水」青睞，股份交投同公司估值都會水漲船高。
