【Now財經台】截至早上11時止，1小時內《彭博》全球用戶關注度上升最多首5隻港股，依次為ESR(01821)、快手(01024)、中國神華(01088)、舜宇光學(02382)、中國移動(00941)。
ESR今朝(11日)開市前出咗兩份通告，其中一份係關於出售私募基金業務權益，總代價2.7億美元，套現所得會用嚟還債，董事會已確定由非核心業務撤資最多7.5億美元，今次只係第一筆。如果集團估值提升，依家市帳率(PB)只得0.7倍，係咪值博？
大唐資本投資策略部總監盧志明指，過去兩年息口持續高企，對手頭上有好多項目嘅ESR不利，集資需求好影響公司債務，今次出售嘅目的係透過減債，集中火力發展新經濟領域業務。佢又話，如果息口見頂及開始逐步向下，ESR依家時嘅發展方向未嘗唔係好事，不過，喺業績出現轉機前，長期低落嘅股價要回升，仍需要一段時間。
