【now.com財經】今朝早都還有個太陽見下，不過天文台話下個星期又會再凍返，凍完又濕又再凍過，真係好易病，大家都要小心；就連恒指呢幾日都忽冷忽熱，日線圖上見陰陽燭梅花間竹咁出現，炒Day Trade嘅影線就無乜話太大，反正啲貨都係日日清，不過炒過夜Hold幾日嘅，見到咁嘅樣應該都會有啲燥底。唔好嬲啦，好歹指數喺日線圖上都仲咬住條50線&「上升通道」底線先啦，好似今日咁，開升45點之後，搭正9點半開閘就高衝上返去16,400點樓上，升逾200點，假設今日餘下落嚟嘅時間佢Hold住喺呢個位嘅話，咁即係指數連續四日都守得住呢啲比較重要嘅技術支持位，連下方兩層過千張期肥牛都唔要，等同於男友放低部電話，唔打手遊陪你，咁你都開心一陣先啦。
望望鐘，依家9點52分，恒指目前仍然處於相對高位，指數升180點，報16,410點，擺位上由本來企於牛熊街貨中軸位，變成依家靠近熊證街貨層，而熊證第一層街貨見16,500至16,599點，以指數暫時最高做過16,489點計，暫時未對熊證做成任何傷亡。
換個小時圖，見噚日最後一粒燭指數於150線上出現「錘頭」，轉勢燭出現&有線支持下，今日彈高亦唔係出奇，只係surprise在於佢一彈就彈到上最高嗰條50線，仲要將擺位喺中軸嘅Slow STC(14.3)兩線重新再兜返上去；作戰室今朝都只係Mark住10/20線咋，點知你chok到咁高做乜。
終於等到10點，重新再睇多次個小時圖，見指數爬到上100線之上，Slow STC(14.3)兩線出兜底，似有機會重新再挑戰多一次50線。
再睇返個五分鐘圖，高位出「圓底」，10線亦千辛萬苦地爬返上去同指數最近，一旦「圓底」頸線上破，恒指牛(50183)，收回價16,050點，同現價有約36點距離，槓桿有約37.3倍，附近收回價中街貨最低，小注出動博指數成功上到小時圖50線；如果唔得嘅話，咁由得佢喺小時圖上面被一堆線掛住先啦。
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰室免費試用：https://www.patreon.com/join/cbbcwar
