【now.com財經】噚日恒指用咗一個朝早嘅時間衝上16,500點樓上之後，下半場以接近橫行+低角度向下回落的姿態下行，不過，擺位計指數仍然靠近上方熊證街貨；今日再睇返恒指牛熊證圖上見，除咗第一層16,500至16,599點見有相當於72張期指街貨流走之外，其餘嘅熊證街貨層都有街貨進場，只係未至於儲到好似牛證嗰邊咁多貨啫。
再睇牛證嗰邊，第一層16,000至16,099點，已經儲到有相當於1,426張期指街貨；第二重重區見第三層嘅15,800至15,899點亦都有相當於1,344張期指街貨。但留意同熊證嗰邊有唔同嘅係，除咗第一層係有街貨流入之外，其餘嘅都係流出，反映到啲街貨有傾向係由牛證流向熊證，但暫時大多數都仲係坐住喺牛證嗰邊。
到咗9點20分，恒指開出第一口價報16,417點，跌20點，由於呢個點數變幅唔大，所以都無喺作戰室預定要出啲咩倉。到咗開市之後，比五分鐘時間指數行定，都真係好彩今朝無即追，事關喺五分鐘圖上已見指數行出「避雷針」咁款嘅陰燭出嚟，形態同「射擊之星」差唔多，只係擺位唔算話好高；又咁講，如果呢支「避雷針」擺嘅位置已經係今日嘅高位的話，咁你Count佢係今日嘅「射擊之星」都無話唔得嘅。
Anyway，見到支咁嘅嘢，淡倉出動亦都順咗個勢快爬格仔先；換個小時圖睇，其實依家未到10點架，指數喺呢半個鐘上上落落之下，推到小時圖上嗰粒燭見「十字星」並架於50/100線中間。
等到10點打後，見指數喺16,400點附近似覓得日內支持，小時圖上見指數重新再借20線企好，同步下方10/100線進一步靠近，有望出現三線匯聚嘅支持，上方50線約16,529點係同現價唔係有好多水位，但開市到依家都只係見指數低波幅度運行，似乎今日都係食雞餬為主。
恒指牛(50205)，收回價16,048點，小心喺呢層牛證裡面搵貨，因為比較多嘅都係高街貨牛，(50205)有8.71%街貨算係低架啦，同現價有約367點距離，槓桿約37.37倍，計劃小時圖出佛系注借20/100/10線睇下有無三線支持，無嘅話，咪再度過囉。
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰室免費試用：https://www.patreon.com/join/cbbcwar
