【Now財經台】置富產業信託(00778)昨日(5日)出咗業績，去年可供分派收益跌7.6%，末期分派減15%至18.02仙，集團點評價呢份成績表？置富今年又有咩部署及計劃？
行政總裁趙宇表示，對比疫情期間，去年整體收益及物業收入淨額都有增長，由於高息環境持續，導致去年可供分派收益較前年少，不過，以今日股價計，投資置富回報仍超過9厘，相信對投資者來講仍然吸引。佢又話，集團已將62%嘅債務掉期至固定息率，加上美國聯儲局即將減息，相信明年表現將會更好。
此外，置富去年租戶續租率高達83%，整體物業組合出租率升至94.4%，Justina相信，個別行業已經見底，例如地產代理，因樓市全面「撤辣」後，交投已顯著回升，至於佔租戶組合30%嘅餐飲業，生意已超過疫情前，而續租租金亦上調中。
展望今年，趙宇指出，旗下商場天水圍置富嘉湖今年第2季會完成資產增值，下一步就輪到紅磡置富都會，而旗下商場會增設體驗式商戶、購物積分制等留住本地客，相信旗下商場客流量繼今年追上2018年平均水平後，有望進一步提升。
